Lífið í Mílanó

Fyrsta blogg á nýju ári

2010-01-12T13:31:00.000-08:00

Jæja, það er óhætt að segja að það er orðið nokkuð langt síðan við blogguðum síðast. Það var allt of mikið að gera hjá okkur síðustu dagana áður en við komum heim og við gerðum í raun ekkert svakalega merkilegt sem hægt var að blogga um. Ég var í prófum og Íris var í einhverjum svaka verkefnaskilum þannig að við vorum í raun bara leiðinlega parið og héngum heima.

En allavega, það sem er búið að gerast síðan síðast er náttúrulega að ég kláraði prófin mín og svo hentum við okkur heim. Það gekk nú svona að mestu stóráfallalaust en við þurfum þó að breyta fluginu okkar þar sem déskotans EasyJet gat ekki flogið með okkur til Berlínar. En í staðinn þá flugum við til Köben og gistum þar eina nótt hjá Ella og Ingu. Þau tóku auðvitað vel á móti okkur og fóru með okkur á bæjarpöbbinn sem var hátt í það að vera soldið sorglegur... en mjög skemmtilegur samt.

Á Íslandi voru svo endalaus matarboð og hittingar þannig að maður náði alveg að bæta á sig þessum nokkru kílóum sem fóru á Ítalíu en það var algjörlega þess virði. Við höfðum allavega nóg fyrir stafni og hefðum í raun þurft nokkra daga í viðbót til að slappa almennilega af áður en skólinn byrjaði hjá Írisi (minn skóli byrjar ekki fyrr en í febrúar þannig að ég er í nokkuð góðum málum ennþá).

Núna liggjum við uppí rúmi og ég horfi á video og blogga á meðan Íris er sveitt yfir tölvunni að vinna í einu af fjölmörgum verkefnum sem hún hefur þessa dagana. Á morgun er svo skóli hjá henni frá 9 – 20 en ég mun líklega bara skella mér í bæinn og svo jafnvel í ræktina. Reyni nú samt að hafa matinn tilbúinn þegar hún kemur heim þannig að ég geri eitthvað gagn.

Eins og ávalt þá stefnum við á að vera duglegri að blogga og vonandi verður frá nógu að segja þar sem við eigum bæði von á gestum og stefnum á að ferðast soldið á þessari önn. Endilega ekki gefast upp á okkur og við reynum að segja frá einhverju skemmtilegu sem við gerum :)

Bingóhelgi í Mílanó

2009-11-17T07:32:00.001-08:00

Föstudaginn þrettánda lögðu þrír heiðursmenn af stað til Mílanó frá hinum ýmsu stöðum Evrópu. Giovanni (a.k.a. Jónas) kom frá London, Alberto (a.k.a. Elli) kom frá Köben og að lokum kom Paolo (a.k.a. Palli) frá Nijmegen, síðasti meðlimur Bingóhópsins Rosino (a.k.a. Örvar) komst ekki í þetta skiptið en byrjað er á undirbúningi næsta Bingóhittings þar sem hann mun einnig mæta. Þessir þrír heiðursmenn voru staðráðnir í því að upplifa Mílanó eins og enginn hafði áður gert og það tókst svo sannarlega. Í stuttu máli sagt var helgin mögnuð, frábær, geðveik og fullt af öðrum góðum lýsingarorðum. En ef þið hafið áhuga á því að heyra meira þá verðið þið bara að halda áfram að lesa.

Þeir mættu semsagt allir á föstudaginn til okkar en Palli mætti síðastur og hitti okkur á Da Willy þar sem við hinir vorum að klára pizzuna. Það fyrsta sem Palli gerði ,eftir að hann var búinn að faðma okkur auðvitað, var að panta stórt glas af Grappa handa okkur öllum... eftir það var ekkert aftur snúið!

Föstudagskvöldið var samt nokkuð rólegt, við skelltum okkur á barinn og fengum okkur alvöru ítalska cocktaila þar sem strákarnir áttuðu sig loksins á því hvernig á að blanda drykki. Ekkert einfaldur eða tvöfaldur eða þannig vesen... það er bara helt áfengi í glasið og svo rétt áður en glasið fyllist alveg þá fær maður smá gos útí :)

Við kíktum svo á Tiseanese þar sem við hittum Írisi og Söndru sem voru á djamminu og fengum okkur smá að drekka þangað til að börunum lokaði og fórum þá heim á leið þar sem við þurftum að vakna snemma til að túristast soldið.

Við vöknuðum allir eldsnemma og Palli og vekjaraklukkurnar hans fimm tryggðu að enginn gætu mögulega sofið yfir sig. Hann meira að segja hjálpaði Ella að vakna með því að sparka í hann en Jónas hafði óljóst beðið hann um það.

Fyrsta stoppið á laugardaginn var á torgið hjá Duomo... það verður seint sagt að þessi kirkja sé ekki mögnuð við skelltum okkur inní kirkjunna og fundum þá allir fyrir nærveru æðri máttar og drifum okkur þess vegna út og fengum okkur að borða. Íris kom svo og hitti okkur áður en við fórum að skoða eitt frægasta málverk/veggmynd allra tíma, Síðustu kvöldmáltíðina eftir Leonardo Da Vinci. Venjulega er svona tveggja til þriggja mánaða bið en þar sem við fórum sem gestir borgarstjórans í Mílanó þá fengum við að komast inn eins og ekkert sé. Jónas er semsagt með sambönd hérna í Mílanó og reddaðu okkur þarna inn. Upplifunin við að labba inní salinn er engu lík en maður áttar sig enganveginn á þessu fyrr en maður mætir sjálfur á staðinn. En fyrir ykkur sem hafið engan áhuga þá getið þið allavega horft á málverkið hérna að neðan.

Eftir Síðustu kvöldmáltíðina skelltum við okkur á Rugby leik á milli Ítalíu og Nýja Sjálands (auðvitað í boði borgarstjórans og Jónasar). Það er líklega einfaldast að segja að þetta hafi verið fáránlegt... Stemmingin var svakalegt og maður þurfti ekkert að kunna allar reglurnar í rugby til að hafa gaman af leiknum).

Við sátum semsagt í svæði V sem er hægra megin í rauða litnum.

Stemmingin á leiknum var svakaleg :)

Eftir leikinn þá skelltum við okkur á apertivo niðrá Navigli og borðuðum yfir okkur af allkonar góðgæti og drukkum auðvitað í samræmi við matarmagnið. Tvær ítalskar vin konur Palla hittu okkur á apertivo og fóru með okkur á djammið sem innihélt mikinn dans, mikinn svita og nýjan cocktail sem heitir einfaldlega Islandia eða Iceland, eftir því hver biður um hann. Íris og Sonja hittu okkur svo á einhverju klúbb sem er ekkert svo langt frá íbúðinni okkar þannig að eftir djammið þá fengum við okkur öll samloku og löbbuðum svo heim.

Eins og sést á myndunum þá kom Rosario með okkur á djammið. Íris bjó til pappírspésa en útlimirnir voru skildir eftir heima eins og sést.

Á sunnudaginn fórum við svo aftur að Duomo en í þetta skiptið ákváðum við að skella okkur uppá kirkjuna... jámm... við fórum uppá kirkjunna og það er eitthvað sem allir ættu að prófa þegar þeir koma til Mílanó. Ég mæli samt með því að borða eitthvað annað en Burger King áður en þið farið upp... allavega að bíða aðeins ef þið þurfið endilega að borða Burger King.

Hugsa að ég leyfi myndunum að tala frekar en að koma enn og aftur með einhver lýsingarorð eins og frábært, magnað eða stórfenglegt ;)

Eftir Duomo ákváðu við að taka smá rölt og enduðum á svona tveggja tíma göngutúr um helstu götur Mílanó og enduðum óvart í kastalanum og þar var einhver kastalahátíð sem var auðvitað mjög heppilegt.

Myndir og video sýna þá stemmingu:

En eftir helgina þá komst ég allavega að því hvað er algjörlega nauðsynlegt heimilistæki þegar 4 karlmenn búa á sama heimili. Nánari lýsingar eru óþarfar.

Þessi helgi var semsagt frábær í alla staði (það er reyndar skrýtið að segja þetta eftir þessa mynd) og ég get ekki beðið eftir næsta Bingóhittingi.

Halloween

2009-11-03T09:22:00.000-08:00

Síðustu helgi var Halloween og mér var farið að líða mun betur svo við klæddum okkur upp og kíktum út. Þar sem fólk var búið að koma með óteljandi hugmyndir af búning fyrir Magga verð ég eiginlega að deila með ykkur hvernig búningurinn hans endaði. Maggi var hálfur maður eins og hann kallaði það, hann var í skyrtu með bindi og í náttbuxum og inniskóm svaka fínn hehe

Hann er ekki að leita að buxnaklaufinni heldur er hann að sýna hæfileika sína við að mála vegginn fyrir aftan... hmm það er samt ekkert að láta þetta líta betur út...

Myndirnar sýna svo sem búningana ekkert allt of vel, en við stóðum okkur heldur illa að taka myndir þetta kvöld.

...og Maggi með ljósið sitt... fáránlega sáttur eftir að einhver Indverji seldi honum þetta úti á götu. Týndist reyndar 5 sek eftir myndatökuna hehe

Um daginn fengum við svo pakka frá Hrefnu vinkonu... takk fyrir okkur skvísí, alltaf gaman að fá pakka og tala nú ekki um íslenskt nammi! Það er að sjálfsögðu löngu búið hehe

Annars er allt komið á fullt í skólanum, sérstaklega hjá Magga sem er kominn í prófatörn. Jæja farin að læra...

Ciao!

Sameiginlegt blogg

2009-10-28T16:30:00.000-07:00

Þar sem við höfum nánast frá því sama að segja ákváðum við bara að slá tvö frekar hæg blogg saman í eitt tjahh vonandi aðeins öflugra blogg. Við lofum engu en við skulum gera okkar besta í að halda þessu bloggi gangandi...

Eftir heimkomuna frá Spáni fórum við í eitt af sveittari parýum ársins. Þetta kemst allavegana í topp 5 hehe. Lítil krúttuleg íbúð stöppuð af fólki frá öllum heimsáflum (eða svona næstum því) og allir komu með mat frá sínu heimalandi. Það var ekki séns að setjast... svona standandi matarboð/partý.

Tveir Íslendingar bættust í hópinn hérna úti, Sunneva og Frikki. Þau eru bæði að fara í stílistann en Sunneva á heima í gamla herberginu hennar Írisar. Á föstudaginn sl. átti Sunneva afmæli og var að sjálfsögðu haldið upp á það. Við fórum og fengum okkur Sushi og viti menn Maggi var bara sáttur með matinn... maðurinn sem borðar ekki fisk, vel gert! Eftir matinn var svo haldið heim til Sunnevu og Söndru í partý!

Á sunnudaginn var svo antikmarkaður í Navigli og auðvitað kíktum við þangað... og jú þarna var allt gamla dótið...

Íris nældi sér svo í flensuna (samt ekki svína... eða við höldum ekki) og er búin að vera lasin heima síðan á mánudaginn... og þar með misstum við af Lily Allen tónleikunum en vonandi fer Íris að jafna sig á þessari flensu þar sem Halloween er á laugardaginn og mikil dagskrá framundan.

Maggi er búinn að auglýsa eftir grímubúningahugmyndum villt og galið á Facebook og eftir 9 auglýsinga tilraun fékk hann loksins nógu góða hugmynd sem hann nennir að standa í... enn sem komið er, en hann tekur enn við hugmyndum ef þið lumið á einhverjum góðum.

Að lokum eru svo myndir af skólanum hans Magga... skellum inn myndum af skólanum hennar Írisar næst.

Verið svo dugleg að kommenta svo við vitum að það nenni einhver að lesa þetta rugl.

Ciao!